У Беларусі плануюць адкарэктаваць сацпадтрымку людзей, якія пацярпелі ад катастрофы на Чарнобыльскай АЭС і іншых радыяцыйных аварый. Гэта прадугледжвае план падрыхтоўкі праектаў заканадаўчых актаў
на 2026 год. За распрацоўку дакумента адказвае ўрад.
Законапраект прадугледжвае, што ўдзельнікі ліквідацыі наступстваў аварыі на Чарнобыльскай АЭС атрымаюць права на бясплатнае санаторна-курортнае лячэнне або аздараўленне не больш за адзін раз на тры гады. А яшчэ — на пазачарговае абслугоўванне ў арганізацыях аховы здароўя і шпіталізацыю для планавай меддапамогі (інвалідам I-III групы).
Таксама ўлады могуць перагледзець «падыходы па вызначэнні памераў павышэння пенсій асобным катэгорыям удзельнікаў ліквідацыі».
«Падрыхтоўка законапраекта дазволіць узмацніць сацыяльную падтрымку ўдзельнікаў ліквідацыі, увесці неабходныя меры сацыяльнай падтрымкі з улікам стану іх здароўя і ўплыву узроставых фактараў, заслуг перад дзяржавай», — гаворыцца ў абгрунтаванні да законапраекта.
У Жыллёвы кодэкс збіраюцца таксама ўнесці змяненне, якое датычыць ліквідатараў на Чарнобыльскай АЭС. Іх хочуць уключыць у лік тых, у каго ёсць першачарговае права на арэнднае жыллё.
Чытайце таксама
