Для вызвалення журналіста Андрэя Пачобута ў Мінск з афіцыйным візітам мусіць прыехаць польскі палітык, не ніжэйшы за ўзровень намесніка міністра. Пра такую ўмову выхаду на волю палітзняволенага журналіста са спасылкай на крыніцы піша польскае выданне Rzeczpospolita.
Імя Андрэя Пачобута, паводле інфармацыі крыніц выдання, фігуравала ў спісах палітвязняў, вызвалення якіх дабіваліся амерыканцы падчас усіх перамоваў з Аляксандрам Лукашэнкам, але беларускі бок яго кожны раз выкрэсліваў, матывуючы гэта тым, што такое пытанне мусіць вырашацца ў рамках перамоваў Беларусі з Польшчай, паведаміў адзін з суразмоўцаў Rzeczpospolita.
Крыніца польскага выдання паведаміла, што ў Мінску чакаюць візіту ў Беларусь польскага палітыка, не ніжэйшага за ўзровень намесніка міністра, і разлічваюць на аднаўленне палітычных кантактаў. Пры гэтым суразмоўца Rzeczpospolita падкрэсліў, што нават гэта не гарантуе поспеху.
Крыніца, звязаная з беларускімі ўладамі, пацвердзіла Rzeczpospolita, што ў Мінску чакаюць такога візіту і лічаць, што вызваленне будзе залежаць ад «палітычнага дыялогу».
Нагадаем, пасля апошняга вызвалення 250 палітвязняў 20 сакавіка, сярод якіх не было Андрэя Пачобута, польскія ўлады заявілі, што будуць далей намагацца вызваліць журналіста.
Да першага візіту ў Мінск і сустрэчы з Аляксандрам Лукашэнкам спецпасланніка прэзідэнта ЗША Джона Коўла ў чэрвені 2025 года, прапагандыст Юрый Васкрасенскі заяўляў, што «ключ» для вызвалення беларускіх палітвязняў знаходзіцца ў кіраўніка МЗС Польшчы Радаслава Сікорскага. Паводле прапагандыста, альбо ён, альбо кіраўнік канцылярыі прэм’ер-міністра Ян Грабец павінныя прыехаць у Беларусь на перамовы — у гэтым выпадку можна абмяркоўваць памілаванне журналіста Андрэя Пачобута.